Värsli - samichlauszufikon

Direkt zum Seiteninhalt

Hauptmenü:

Värsli

Samichlaus

Samichlaus,

du guete Maa.

Ändlich bisch du weder do!

Chunsch cho luege, was ich mache,

wie n' ich spiele, singe ond lache.

Tuesch mich lehre Herz verschänke -

echli meh a anderi z' dänke.

So werd ich denn au sälber froh

und d' Wiehnachte cha nöcher cho!


***


Samichlaus, ich ha en Frog:
Säg, was machsch Du jede Tag?
Flügsch im Sommer au devo
uf ne Insle irgendwo?
Liesch du au emol am Strand
ond hesch en Iiscrème i der Hand?
Gosch go fische mit dim Bart?
Machsch im Bus e Stadtrundfahrt?
Oder blibsch du immer dehei,
i dim Wald, so ganz elei?
Höcklisch gmüetlich vor dim Huus,
ond gsesch zfrede ond glöcklich us?


***

För vieles stellt mer hött en Roboter aa,
mer seid, ohni Computer chas nöd gah.

Es git Ragete ond Satellite,
und doch wird uf de Erde immer no gschtritte.

Mer schafft vieles ab und tuet ume hetze,
nur dich, Samichlaus, cha niemer ersetze.

Du lasch dich nöd vom Moderne lo leite,
und läbigi Schmutzli düend dich begleite.

Ziesch all Jahr z' Fuess dur euses Land,
dreisch immer s' rot und goldige Gwand.

Für jede Familie häsch Ziit und machsch halt,
Ich danke Dir im Name vo jung und alt!

***

Samichlaus, wo chunsch du här?
Siebehundert Stund wiit här.

Samichlaus, isch s' Säckli schwär?
Siebehundert Pfund isch's schwär!

Samichlaus, mach's weidli läär,
denn isch dis Säckli nümme schwär!

***

Samichlaus, wo chunsch du här?
Warum isch din Sack so schwär?
Bisch de ganzi Wald dur gloffe?
Hesch vellecht s' Chrischchindli no aatroffe?
S' hed sicher gseid, s' chömm au scho glii.
Gäll Chlaus, ich be e Liebi(e) gsii!

***

Samichlaus, du Guetä,
gib mir dini Ruetä.
Will det druus es Füürli mache,
uf em Füürli Chüechli bache.
D' Chüechli dänn dir gäh zom Ässe,
dass du Ruetä chasch vergässe!

***

S' Chrischchindli und de Samichlaus
                           
Es dunklet scho im Tannewald und schneielet ganz liisli   
Was isch das für es Liechtli det i säbem chline Hüüsli?
Da isch de Samichlaus diheim mit sine guete Sache!
Er hät scho s' Lämpli azündt und dued grad Kafi mache.

Do pöpperlets am Lädeli und s' Glöggli ghört är lüte!
Jetz weiss är scho wer dusse isch ond was das söll bedüte.
S' Chrischchindli chund no zobig spot - es wird ihn welle stupfe.
Är mues de Sack bald före näh und sini Finke lupfe.

S' Chrischchindli seid: "Herr Samichlaus, e schöni Ornig händ Ihr!
De Chrischttag stoht ja vor de Tür - händ Ihr denn kei Kaländer?
S' brucht Wiehnachtsbäum i jedes Huus, für vieli hundert Chinde,
Ihr müends im Wald na haue hüt, de Vollmond sell Eu zünde!"

De Samichlaus stellt d' Tasse ab: "Nur ned so gsprängt, Chrischchindli -
Die Bäum müend gwüss bsorget sii, das häd no Ziit es Stündli.
Ich möcht jetz ämel no in Rueh min Z' Abig fertig chäue -
und wenn es Tässli gfällig wär, so würds mi herzli freue!"

S' Chrischchindli lachet: "nu so denn, de beni nüt dergäge.
Es bitzli öppis warms tuet guet - uf minie vele Wäge.
Me cha ja denn no allerlei Abrede und usmache,
was jedes Chind söll öbercho, vo dene schöne Sache!"

Sie sitzed gmüetlich binenand im chline Stübli hinde,
de Vollmond zündt d' Laterne aa und lueget heimlich ine.
Er loset lang am Fänschterli und uf de Hustürschwelle -
wänn är nu besser schwätze chönt, er müest mer's gwüss verzelle!

***

Guete Obig, Samichlaus!
Lueg, ich bi no chli,
aber i wott alli Tag,
immer e Brave sii!

Hesch gwüss öppis Guets i Sack,
will Du e Liebe bisch.
Und ich säge vele Dank,
wenn d' mer es Nüssli gisch.

Aber d' Ruete, Samichlaus,
mues ich gwüss ned ha.
I ha drom nid Tätsch verdient,
gäll, Du gsesch mer's jo aa!

***

Hesch Du, Samichlaus, au es Hobby?
Striitisch Du mit em Schmutzli nie?
Muesch Du mängisch au i d' Migros?
Gosch Du au emol eis go zieh?

Chasch denn Du a alles dänke?
Und zu so vill Chinde goh?
Wieso weisch Du, wo ich wohne,
und öb ich au gfolget ha?

Häsch Du, Samichlaus au e Chatz?
Chunsch Du bim Computer druus?
Chasch Du italienisch singe?
Schlofsch Du am Sunntig us?

Frog ich s' Mami, weiss sie's ned.
Sie luegt mich nur gschpässig aa.
Blinzlet, lachet ond seid eifach:
Er isch halt e bsundere Maa!!

***




Weitere Versli finden Sie auch in diesem Buch
von Christian Hablützel:

 
Zurück zum Seiteninhalt | Zurück zum Hauptmenü